Գերմանացի պատգամավորներն անակնկալ չեղարկել են Թուրքիա այցը

Գերմանիայի Բունդեսթագի պատգամավորներն անակնկալ չեղարկել են Թուրքիա այցը:

Ըստ Demokrathaber-ի՝ Գերմանիայի խորհրդարանի փոխնախագահ Կլաուդիա Ռոտը հայտարարել է, որ մայիսի 25-28-ը պլանավորված այցելությունը չեղարկվել է վերջին րոպեին: Պատճառը դեռևս չի հաղորդվում:

Գերմանացի պատգամավորները պլանավորում էին այցելել նաև Ստամբուլ և քրդաբնակ Դիարբեքիր և քննել սահմանադրական փոփոխությունների վերաբերյալ հանրաքվեից հետո երկրում տիրող իրավիճակը:

Հիշեցնենք, որ Գերմանիայի և Անկարայի միջև հարաբերությունները սրվել էին վերջերս Ստամբուլում գերմանական պարբերականի թուրք լրագրող Դենիզ Յուջելի կալանավորումից հետո: Մինչ օրս շարունակվող լարվածության շրջանակներում վերջերս Թուրքիան չէր թույլատրել գերմանացի պատգամավորներին այցելել «Ինջիրլիք» ռազմաբազա, որտեղ գտնվում են նաև գերմանացի զինվորականները: