Ադրբեջանական խնձոր ներմուծող ընկերությունը չկա, հայտնի չէ. ՍԱՊԾ պետ

Կառավարության նիստից հետո ՍԱՊԾ պետ Իշխան Կարապետյանը լրագրողների հետ զրույցում անդրադարձավ վերջին օրերին աղմուկ հանած հարցին` Հայաստան ներկրվող թուրքական լոլիկին ու ադրբեջանական խնձորին:

Իշխան Կարապետյանը նշեց, որ ապրիլի 23-ին ստացված հաղորդագրությունների հիման վրա ՍԱՊԾ-ը շրջայց է կատարել Երևանի ու մարզերի մի շարք իրացման կետերում, և ապրիլի 25-ի երեկոյան իրականացված աշխատանքների հիման վրա պարզ դարձավ, որ ադրբեջանական խնձորը չուներ հավաստագիր և, համաձայն օրենսդրության, ենթակա էր օգտահանման:

Ներկայումս ՍԱՊԾ-ը ՊԵԿ-ի հետ համատեղ գործողություններ է իրականացնում` բացահայտելու խնձորի վերջնական խմբաքանակը, նաև կատարվում է լաբորատոր փորձաքննություն, որից հետո հանդես կգան համատեղ հայտարարությամբ, հավանաբար` երկուշաբթի կամ երեքշաբթի օրը: Հիմնական խմբաքանակը, նրա խոսքով, արդեն իսկ  հանվել է իրացման տեղերից:

«Ներմուծող ընկերություն չկա»,- ասաց ՍԱՊԾ պետը` ի պատասխան հարցին, թե ով է ներկրել այդ խնձորը: Ըստ փաստաթղթերի` խնձորի` ադրբեջանական ծագման վերաբերյալ փաստաթուղթ առկա չի եղել:

Կարապետյանը հավելեց, որ օրենսդրությամբ թույլատրվում է ներկրել մինչև 50 կգ համապատասխան գյուղմթերք: