Հրաչյա Հարությունյանը կտեղափոխվի Հայաստան

ՌԴ-ում 6 տարի 9 ամիս ժամկետով ազատազրկման դատապարտված ՀՀ քաղաքացի Հրաչյա Հարությունյանը կարտահանձնվի Հայաստանին: Այս մասին Yerkir.am-ի հետ զրույցում ասաց արդարադատության նախարարի տեղակալ Վիգեն Քոչարյանը:

Հիշեցնենք, որ Հրաչյա Հարությունյանը իր «ԿամԱԶ» մակնիշի մեքենայով 2013-ի հուլիսի 13-ին ՌԴ Պոդոլսկի շրջանի մերձակայքում բախվել էր մարդատար ավտոբուսի, ինչի հետևանքով զոհվել էր 18 մարդ: Նա դատապարտվել էր 6 տարի ու 9 ամիս ազատազրկման:

Վիգեն Քոչարյանը չնշեց արտահանձնման ժամկետներ, սակայն ասաց, որ ՀՀ իշխանությունները, արդարադատության նախարարությունը հետևողական ջանքեր են գործադրել դատապարտյալի փոխանցման խնդրի լուծման ուղղությամբ, և ներկայումս Հրաչյա Հարությունյանին Հայաստանին փոխանցելու` ֆինանսական պարտավորությունների առկայության խոչընդոտը վերացված է: