Բիզնես խարխլող հարկադրական միջոցներ պետք է ձեռնարկել միայն ծայրահեղ դեպքերում. վարչապետ

Այսօր կառավարության նիստում օրակարգին անցնելուց առաջ վարչապետ Կարեն Կարապետյանն անդրադարձավ հերթական հանձնարարականներին: Առաջին հանձնարարականն ուղղված էր իրավապահ մարմիններին, այն է՝ չխաթարել բիզնեսի զարգացմանը: Նրա խոսքով՝ ՀՀ տնտեսության զարգացման համար մեծ կարևորություն ունի բիզնես միջավայրի բարելավման համար նպաստավոր պայմանների ստեղծումը, որոնք կապահովի բիզնեսի անխափան ընթացք:

Հաշվի առնելով գործարարության զարգացման և խրախուսմանն ուղղված քայլերի շարունակականությունը` վարչապետը հանձնարարեց ՀՀ իրավական մարմիններին` հանցավորության դեմ պայքարում իրենց իրավասության շրջանակում հայեցողական լիազորություններ իրականացնելիս հնարավորինս խուսափել տնտեսվարող սուբյեկտների գործունեությանը միջամտելուց, իսկ բիզնես խարխլող կամ այլ վատթարացնող հարկադրական միջոցներ ձեռնարկել միայն ծայրահեղ դեպքերում: