Հոլանդիայում աղոթքի ժամանակ մզկիթների դռները կփակեն՝ ահաբեկչություններից խուսափելու համար

Հոլանդիայում խոշոր մզկիթները աղոթքի ժամանակ կսկսեն դռները փակել՝ կանադականին նման ահաբեկչություններ թույլ չտալու համար: Այս մասին հայտնել է Նիդերլանդների ANP լրատվական գործակալությունը՝ վկայակոչելով մուսուլմանական սրբավայրերի ներկայացուցիչներին:

Աղոթքի ժամանակ ելումուտի արգելքը կտարածվի 4 խոշոր մզկիթների վրա, որոնք գտնվում են Ամստերդամում, Ռոտերդամում, Հաագայում եւ Ուտրեխտում: Դռները փակելու որոշումը ընդունել են կրոնական հաստատությունների խորհուրդները, որոնք  հրավիրվել են Կանադայում մզկիթի վրա ահաբեկչական հարձակումից հետո:

Քվեբեք Սիթիի մզկիթի վրա հարձակումը կատարվել է կիրակնօրյա երեկոյան աղոթքի ժամանակ: Դիմակավորված 2 անհայտ անձ կրակ են բացել այնտեղ գտնվող 40-ից մինչեւ 100 մարդու վրա: 6 մարդ մահացել է, 8 մարդ վիրավորվել: Կանադայի վարչապետը կատարվածը «բռնության անիմաստ ակտ» եւ «մուսուլմանների վրա ահաբեկչական հարձակում» է համարել: