Փոխզիջումը միայն տարածքը չէ. վարչապետը խոսել է Ղարաբաղյան հակամարտության մասին

Այսօր վարչապետի հրավիրած մամուլի ասուլիսում հնչեց հարց ԼՂ հակամարտության վերաբերյալ` ի՞նչ լուծման կողմնակից է վարչապետը, արդյո՞ք խաղաղության դիմաց տարածքներ զիջելն ընդունելի է համարում: Կարեն Կարապետյանը պատասխանեց, որ այդ տարբերակն ընդունելի չի համարում:

«Վստահ եմ, որ մենք ունենք տարբերակ: Մեր ինքնասիրությունը, մեր անվտանգությունը, մեր հաղթանակը մենք կարող ենք պաշտպանել, պահել համապատասխան տրամաբանական բանակցությունների արդյունքում: Թե ինչպիսի՞ն կլինի բանակցությունների ընթացքը, այս պահին անտրամաբանական է խոսել: Փոխզիջումը միայն տարածքը չէ, տարբեր բաներ կարող են լինել փոխզիջման առարկա: Երբ կգա պահը, այն ժամանակ էլ կքննարկենք: Բայց ես չեմ կարծում, որ ՀՀ-ում որևէ մեկը պատասխանատվություն վերցնի կայացնել այնպիսի որոշում ԼՂ կարգավորման վերաբերյալ, որի հետ ազգը, մեր քաղաքացիները համաձայն չլինեն: Այդ իսկ պատճառով չեմ կարծում, որ մենք շատ անհանգստանալու բան ունենք»,- ասաց Կարեն Կարապետյանը: