Ցանկացած պաշտոն մարդունը չէ. նախկին նախարարը փիլիսոփայեց

Այսօր ՀՀԿ համագումարին մասնակցող` էկոնոմիկայի նախկին նախարար Կարեն Ճշմարիտյանից լրագրողները հետաքրքրվեցին, թե ինչո՞ւ իրեն պաշտոնանկ արեցին, նախընտրեցին մեկ ուրիշի:

Կարեն Ճշմարիտյանը նախ պատասխանեց, որ պաշտոնին հրաժեշտ տվեց քաղաքական համաձայնությունների արդյունքում, ինչը շատ նորմալ է: «Գիտե՞ք, առհասարակ, ցանկացած պաշտոն մարդունը չէ»,- փիլիսոփայեց նա:

 Հարցին, թե ինչո՞վ է զբաղվում ներկայումս, Կարեն Ճշմարիտյանը պատասխանեց, որ զբաղվում է իր առօրյա հոգսերով, ընթերցանությամբ, դասավանդում է պետական տնտեսագիտական համալսարանում` «Ներդրումների ու նորարարությունների կառավարում» առարկան:

Մեր հարցին, թե խորհուրդներ չի՞ տվել նոր վարչապետին, թե ինչպես ներդրումներ ապահովել, քանի որ նման առարկա է դասավանդում, նախկին նախարարը պատասխանեց. «Ես նրան իմ խորհուրդներն արդեն տվել եմ»: