Ողբերգական դեպք` Ստանիսլավսկու անվան թատրոնում. աշխատակցուհին բարձրախոսն անջատելիս ընկել է ու մահացել

Երևանի Ստանիսլավսկու անվան թատրոնում երեկ ուշ երեկոյան ողբերգական դեպք է տեղի ունեցել.  հայտնաբերվել է թատրոնի երկարամյա աշխատակցուհի Աստղիկ Մուշեղյանի դին: Այս մասին Yerkir.am-ին տեղեկացրեց թատրոնի տնօրեն Ֆրեդերիկ Դավթյանը: Մահացածը Ստանիսլավսկու անվան թատրոնում աշխատել է որպես հնչյունային ռեժիսոր:

Աստղիկ Մուշեղյանը ներկայացումից հետո բարձրացել է` վերևում տեղակայված բարձրախոսն անջատելու,  այնտեղից  ընկել է ու մահացել:

«Կախովի բարձրախոս է եղել: Ներկայացումը մեծ էր, և պահանջեցին, որ լինեն կախովի միկրոֆոններ: Մենք այդ ամեն ինչն անում ենք ցերեկով, խստիվ արգելված է երեկոյան վերևի աշխատանքներ կատարել: Մենք այդ մոնտաժն էլ ենք անում ցերեկով: Արդեն բոլորը թատրոնից գնացել էին, թե նա ինչո՞ւ է բարձրացել և ուզեցել անջատել միկրոֆոնը ու մոնտաժ անել, պարզ չէ»,- ասաց թատրոնի տնօրենը՝ հավելելով, որ, քննիչների նախնական վարկածով, Աստղիկ Մուշեղյանի մահը կարող էր վրա հասած լինել ինսուլտի կամ ինֆարկտի հետևանքով, և դա կպարզվի փորձաքննության արդյունքում: