Նորաստեղծ ընտանիքներին միանվագ օգնություն տրամադրելու հարցը կքննարկվի առաջիկայում

Կառավարության վաղվա նիստի օրակարգում սոցիալական հարցերի նախարարությունը  ներառել է հարց «Նորաստեղծ ընտանիքներին միանվագ դրամական օգնություն տրամադրելու մասին» օրենքի նախագծի վերաբերյալ կառավարության եզրակացության նախագծի մասին: Օրենսդրական նախաձեռնությունը ներկայացրել են ԱԺ պատգամավորներ Հեղինե Բիշարյանը, Մհեր Շահգելդյանն ու Հովհաննես Մարգարյանը: Նրանք առաջարկում էին նորաստեղծ ընտանիքներին տրամադրել միանվագ դրամական օգնության, որի նվազագույն չափը չի կարող պակաս լինել, քան 300.000 դրամը:

Կառավարությունը, սակայն, գտնում է, որ  նախագծի ընդունումը կհանգեցնի լրացուցիչ հատկացումների անհրաժեշտության, սակայն դրանում հստակ նշված չէ նորաստեղծ ընտանիքներին միանվագ դրամական օգնության տրամադրման ֆինանսավորման աղբյուրը: Եթե այն պետական բյուջեն է, ապա հարկ է նշել, որ այդ նպատակով 2017 թվականի պետական բյուջեի նախագծով համապատասխան միջոց­ներ նախատեսված չեն:

Կառավարությունը համարում է, որ ընտա­նիքներին վերաբերող հարցերը ենթակա են քննարկման ժողովրդագրական իրավիճակի բարելավման ազգային ծրագրի քննարկումների շրջանակում՝ հաշվի առնելով բյուջեի հնարավորությունները: