Նախապատրաստվում են ջեռուցման շրջանին

Արագածոտնի մարզում գործող  հանրակրթական դպրոցներում սկսվել են ջեռուցման շրջանի նախապատրաստության աշխատանքները:  Մարզի 118 դպրոցների մեծ մասն ունի ջեռուցման լոկալ համակարգ, որոնք աշխատում են բնական գազով, էլեկտրաէներգիայով կամ հեղուկ վառելիքով:

Նախապատրաստական  լրացուցիչ աշխատանք են պահանջում հատկապես այն դպրոցները, որոնք ջեռուցվում են անհատական վառարաններով: Մարզպետ Գաբրիել Գյոզալյանի հանձնարարությամբ` ներկայումս ճշգրտվում է դպրոցներում ջեռուցման համար անհրաժեշտ հեղուկ վառելիքի քանակությունը, իրականացվում են դրանց ներկրման հետ կապված կազմակերպչական աշխատանքները:

Նշենք, որ, մարզի բնակլիմայական պայմաններից ելնելով, ջեռուցումը դպրոցներում միասնական ժամանակահատվածում չի իրականացվում: Բարձրլեռնային գոտում գտնվող Արագածի եւ Ապարանի տարածաշրջաններում այն սկսվում է արդեն նոյեմբերի 1-ից, իսկ նախալեռնային գոտում`  նոյեմբերի 15-ից:

ՀՀ Արագածոտնի մարզպետարանի տեղեկատվության եւ հասարակայնության հետ կապերի բաժին