Եղնիկ համայնքում գյուղապետին կորոշեն վիճակահանությամբ

Արագածոտնի մարզի Եղնիկ գյուղում երեկ կայացած համայնքապետի ընտրություններում գյուղապետի պաշտոնում առաջադրված երկու թեկնածուները հավաքել են հավասար քանակությամբ՝ 107-ական ձայն: Նշենք, որ հիշյալ գյուղում միմյանց դեմ պայքարել են գործող ՀՀԿ-ական գյուղապետ Աշոտ Առաքելյանը և Եղնիկի հիմնական դպրոցի ուսուցիչ, անկուսակցական Արծրուն Սարգսյանը:

Yerkir.am-ի հետ զրույցում ՀՀ Կենտրոնական ընտրական հանձնաժողովի մամլո խոսնակ Հերմինե Հարությունյանը պարզաբանեց, թե ինչպես է կարգավորվելու հարցը: Նրա խոսքով՝ եթե հավասար թվով առավելագույն կողմ քվեարկված քվեաթերթիկներ են ստացել երկու թեկնածուներ, ապա գյուղապետին որոշելու համար անցկացվում է վիճակահանություն:

Թիվ 15 ընտրատարածքային ընտրական հանձնաժողովը Արագածոտնի Եղնիկ համայնքի ղեկավարի ընտրությունների արդյունքները կամփոփի նիստում քվեարկության օրվանից հետո 5-րդ օրը` սեպտեմբերի 23-ին, հաղթողին որոշելով վիճակահանությամբ: Նիստին կարող են մասնակցել ԶԼՄ ներկայացուցիչներ, դիտորդներ, ինչպես նաև թեկնածուները: