Քաղաքացիները երկքաղաքացիություն ստանալու մասին պարտավոր չեն լինի հայտնել ոստիկանությանը

Կառավարությունն այսօրվա նիստում հավանություն տվեց ոստիկանության ներկայացված նախագծերի փաթեթին, որով նախատեսվում է վերացնել ՀՀ քաղաքացու կողմից այլ պետության քաղաքացիություն ընդունելու կամ ստանալու դեպքում լիազոր մարմնին սահմանված կարգով հայտնելու պահանջը ու այդ մասին չհայտնելու համար նախատեսված վարչական պատասխանատվությունը:

Նախագիծը ներկայացրեց ՀՀ փոխոստիկանապետ Վարդան Եղիազարյանը: Ըստ նրա` պրակտիկայի վերլուծությունից պարզ է դառնում, որ հիմնականում երկքաղաքացիության փաստերը ի հայտ են եկել ոչ թե երկքաղաքացիների կողմից այդ մասին սահմանված կարգով տեղեկացնելու, այլ անձնագրային և վիզաների վարչության կողմից նրանց մատուցվող ծառայությունների ընթացքում, իսկ վարչական պատասխանատվության ենթարկվել է ընդամենը 1 անձ:

2015 թվականի հոկտեմբեր ամսի դրությամբ՝ ՀՀ բնակչության պետական ռեգիստրի բազայում առկա են եղել 83.155 երկքաղաքացու վերաբերյալ տվյալներ: