Արծվիկ Մինասյանն այցելել է Առևտրաարդյունաբերական պալատ

Ապրիլի 29-ին ՀՀ էկոնոմիկայի նախարար Արծվիկ Մինասյանի և նախարարության ոլորտային պատասխանատուների մասնակցությամբ ՀՀ Առևտրաարդյունաբերական պալատում կայացել է հանդիպում արդյունաբերողների հետ: 

Ներկայացնելով ՀՀ Առևտրաարդյունաբերական պալատի իրականացրած աշխատանքն ու գործառույթները` պալատի նախագահ Մարտին Սարգսյանը անդրադարձել է  արդյունաբերողների առջև ծառացած խնդիրներին և դրանց լուծման առաջնահերթություններին: 

Քննարկվել են արտահանման, ներդրումներին, մաքսային, հարկային, ոլորտային  անհրաժեշտ օրենսդրական փոփոխություններին առնչվող հարցեր:

ՀՀ էկոնոմիկայի նախարար Արծվիկ Մինասյանը ներկայացրել է տնտեսության զարգացման տեսլականը, նշել փոփոխությունների իրականացման գործում գործարարների ակտիվության անհրաժեշտությունը և լսելով հանդիպմանը ներկա ընկերությունների ղեկավարների բարձրացրած խնդիրները` հանդիպմանը մասնակից էկոնոմիկայի նախարարության ոլորտային պատասխանատուներին տվել համապատասխան հանձնարարականներ: 

Հանդիպման ավարտին պայմանավորվածություն է  ձեռք բերվել նման քննարկումները դարձնել պարբերական` ՀՀ էկոնոմիկայի նախարարին նախօրոք ներկայացված  առաջարկությունների շուրջ արդյունավետ լուծումներ գտնելու նպատակով: