Կարմիր խաչն առաջին բուժօգնության դեղեր և բժշկական պարագաներ կտրամադրի

ԼՂՀ առողջապահության նախարար Կարինե Աթայանն ընդունել է Կարմիր խաչի միջազգային կոմիտեի Հայաստանի պատվիրակության պաշտպանության բաժնի պատվիրակ Վալերի Յարմակին և Արցախում Կարմիր խաչի միջազգային կոմիտեի հասարակայնության հետ կապերի բաժնի ներկայացուցիչ Էթերի Մուսայելյանին: 

Հանդիպման ժամանակ Վալերի Յարմակը նախարարին տեղեկացրել է, որ իրենց կազմակերպությունը պատրաստ է օգնության ձեռք մեկնել առողջապահության նախարարությանը, մասնավորապես նշել է, որ կտրամադրվեն առաջին բուժօգնության անհրաժեշտ դեղեր և բժշկական պարագաներ:

Հանդիպման ավարտին Կարինե Աթայանը շնորհակալություն է հայտնել Կարմիր խաչի միջազգային կոմիտեի Հայաստանի պատվիրակության պաշտպանության բաժնի պատվիրակ Վալերի Յարմակին պատրաստակամության և մշտական աջակցության համար: Նախարարը կարևորելով Կարմիր խաչի միջազգային կոմիտեի հետ համագործակցությունը, բարձր է գնահատել կոմիտեի կողմից մինչ այժմ Արցախում իրականացված աշխատանքները: