Սուրիկ Խաչատրյանի տան մոտ տեղի ունեցած միջադեպի գործով վերաքննիչ բողոքը մերժվեց

Այսօր Վերաքննիչ քրեական դատարանը, դատավոր Մխիթար Պապոյանի նախագահությամբ, մերժեց 2013-ի հունիսին Սյունիքի մարզպետ Սուրիկ Խաչատրյանի տան մոտ տեղի ունեցած միջադեպի գործով վերաքննիչ բողոքն ու անփոփոխ թողեց Սյունիքի մարզի ընդհանուր իրավասության առաջին ատյանի դատարանի վճիռը:

Հիշեցնենք, որ Սյունիքի մարզի ընդհանուր իրավասության դատարանի դատավոր Նապոլեոն Օհանյանի վճռով` Արտակ Բուդաղյանը մեղավոր էր ճանաչվել ՀՀ քրեական օրենսգրքի 137 հոդվածի 1-ին մասով նախատեսված հանցագործության կատարման մեջ և նրա նկատմամբ, որպես պատիժ, նշանակվել էր տուգանք` 120.000 ՀՀ դրամի չափով, որը, սակայն, համաներման ակտով չէր կիրառվել:

ՀՀ վերաքննիչ քրեական դատարանում Արտակ Բուդաղյանի պաշտպան Հայկ Ալումյանը պահանջում էր ամբողջությամբ բեկանել ՀՀ Սյունիքի մարզի ընդհանուր իրավասության դատարանի` Արտակ Բուդաղյանի նկատմամբ կայացրած դատավճիռը և Բուդաղյանին իրեն առաջադրված մեղադրանքում ճանաչել անմեղ ու արդարացնել: