Գալուստ Սահակյանի մոտ նկատվել է արյան շրջանառության անցողիկ խանգարում

Երեկ երեկոյան հոսպիտալացված` ԱԺ նախագահ Գալուստ Սահալյանը շարունակում է գտնվել թիվ 1 համալսարանական հիվանդանոցի վերակենդանացման բաժանմունքում: Yerkir.am-ի թղթակցին ԱԺ հասարակայնության և լրատվության վարչության պետ Արսեն Բաբայանը հայտնեց, որ բժիշկները նրա առողջական վիճակը գնահատել են բավարար, ինքնազգացողությունը լավ է:

«Երեկ երեկոյան ժամը 8-ի կողմերը վատացել էր նրա ինքնազգացողությունը, որոշել էին տեղափոխել հետազոտության, արդյունքում` հայտնաբերվել է ճնշման տատանում, նշանակվել է լրացուցիչ հետազոտություն, որի արդյունքում էլ հայտնաբերվել է արյան շրջանառության անցողիկ խանգարում»,- ասաց նա՝ հավելելով, որ Սահակյանն այժմ գտնվում է բժիշկների հսկողության տակ:

Հարցին, թե ե՞րբ կապաքինվի և կվերադառնա աշխատանքի, Բաբայանը պատասխանեց. «Բժիշկները կորոշեն, երկար չի տևի»:

Նա միաժամանակ հավաստիացրեց, որ ԱԺ նախագահը սրտի հետ կապված խնդիրներ չունի: