Որոշ պաշտոնյաների պետք է ազատել զբաղեցրած պաշտոններից. Հովիկ Աբրահամյան

Այսօր կառավարության նիստում վարչապետ Հովիկ Աբրահամյանն անդրադարձավ օրեր առաջ կառավարությունում տեղի ունեցած այն խորհրդակցությանը, որի ընթացքում Վերահսկիչ պալատը ներկայացրել էր ուսումնասիրություններ Արագածոտնի և Կոտայքի մարզերի սոցիալական ծառայությունների և տարածքային գործակալությունների վերաբերյալ:

«Խորհրդակցության ընթացքում մանրամասն լսել ենք բոլոր կողմերին: Ինձ համար անընդունելի են այն արդարացումները, որոնք հնչում էին խորհրդակցության ժամանակ, դրանց մեծ մասն անհիմն են»,- ասաց վարչապետը:

Նա հանձնարարեց ՏԿԱԻ նախարար Արմեն Երիցյանին` մարզպետների հետ քննարկել այդ հարցը:

«Ես համոզված եմ, որ կան դեպքեր, երբ պետք է այդ պաշտոնյաներին ազատել զբաղեցրած պաշտոններից և հանրությանը տեղեկացնել այդ ամենի մասին: Նաև` ինձ համար ընդունելի է Վերահսկիչ պալատի խորհրդի որոշումը, որ բոլոր սոցիալական ծառայություններում իրականացվեն ստուգումներ: Դա այն ոլորտն է, որտեղ անաչառությունը պետք է անպայման ապահովվի, ինչպես նաև` մնացած բոլոր ոլորտներում»,- եզրափակեց Հովիկ Աբրահամյանը: