Աննախադեպ հսկողություն է իրականացվում ԱԺ-ի և կառավարության շենքերում

Այսօր կառավարության հերթական նիստի օրն է: Կառավարության շենքի առջև բողոքի ակցիա են անցկացնում գերակա շահ ճանաչված տարածքների բնակիչները:

Ի դեպ, կառավարության շենքի շրջակայքում և ներսում իրականացվում է աննախադեպ հսկողություն: Շենքում անվտանգության աշխատակիցները սովորականից ավելի շատ են և բոլորը զինված ինքնաձիգներով: Նման ուժեղացված հսկողություն նախկինում չէր եղել կառավարության շենքում:

Նշենք, որ, անցյալ չորեքշաբթի օրվա երկրորդ կեսից սկսած, ուժեղացված անվտանգության աշխատանքներ էին իրականացնում նաև ԱԺ-ում, որտեղ նույնպես զինված էին ոչ թե ատրճանակներով, ինչպես միշտ, այլ Կալաշնիկովի  ինքնաձիգներով:

Այսօր «Հայկական ժամանակ» թերթը գրել է, որ քաղաքական շրջանակներում շրջանառվում է վարկած, որ Նորք-Մարաշում զինված խմբավորման թիրախը եղել են ԱԺ-ն և Հովիկ Աբրահամյանը:

Հիշեցնենք, որ երեկ ԱԱԾ-ն Նորք-Մարաշում հայտնաբերել և վնասազերծել էր խումբ, որը մեծ քանակությամբ զենք է թաքցրել: