Երեխաների հետ ինքնահրկիզման փորձ կատարածը նախկինում էլ է նման քայլի դիմել. մանրամասներ

Yerkir.am-ին  մանրամասներ են հայտնի դարձել երեկ գիշերը Երևանի Խանջյան-Նալբանդյան փողոցների խաչմերուկի մոտակայքում 5 և 2 տարեկան երեխաների հետ ինքնահրկիզման փորձ կատարած քաղաքացու մասին: Մեր տեղեկություններով՝ 40-ամյա քաղաքացին նախկինում ևս ինքնավնասման փորձ է կատարել (փորձել է պարանոցը կտրել): Տեղեկություններ կան, որ նա հոգեկան առողջության հետ կապված խնդիրներ ունի:

Yerkir.am-ին ոստիկանությունից հայտնեցին, որ դեպքի կապակցությամբ ոստիկանության Կենտրոնի բաժնում հետաքննություն է ընթանում:

Հիշեցնենք, որ 40-ամյա կինը երեխաների հետ փորձել էր ինքնահրկիզվել` դյուրավառ նյութն (բենզին) իր վրա լցնելով: Մինչ հրշեջ-փրկարարների կանչի վայր հասնելը՝ ոստիկանները կանխել են ինքնահրկիզման փորձը: Քաղաքացին ստացել է տարբեր աստիճանի այրվածքներ՝ վերին և ստորին վերջույթների շրջանում, և հոսպիտալացվել «Ճառագայթային բժշկության և այրվածքների կենտրոն» բժշկական կենտրոն: Ըստ բժիշկների՝ տուժածի առողջական վիճակը ծանր է: