Կառավարությունը նոր վարկ է վերցնում՝ գյուղական ենթակառուցվածքները զարգացնելու համար

Կառավարության այսօրվա նիստում կառավարության աշխատակազմի ղեկավար-նախարար Դավիթ Հարությունյանը ներկայացրեց ՀՀ և Միջազգային զարգացման ՕՊԵԿ հիմնադրամի միջև 2015 թվականի սեպտեմբերի 3-ին ստորագրված՝ «Ենթակառուցվածքների և գյուղական ֆինանսավորման աջակցություն» ծրագրի ֆինանսավորման համաձայնագիրը: 

Նախագծի նպատակն է բարելավել բնակչության տնտեսական և սոցիալական վիճակը` ծրագրի իրականացման տարածքում ստեղծելով եկամտի աճի և զբաղվածության կայուն հնարավորություններ: Ծրագրի բաղադրիչներն են` գյուղական ենթակառուցվածքների ֆինանսավորում, ֆերմերների իրազեկում և աջակցություն:

ԳՖԿ-ի միջոցով մասնակից ֆինանսական հաստատություններին կտրամադրվեն ֆինանսական միջոցներ, որոնք վարկերի տեսքով կուղղվեն փոքր տնտեսություն վարողներին, ինչպես նաև փոքր և միջին ձեռնարկություններին՝ գործունեության բարելավման և եկամուտների ավելացման համար: Նաև կբարելավվեն ջրամատակարարման և ոռոգման համակարգերը հանրապետության 7 մարզերի՝ Շիրակ, Լոռի, Տավուշ, Գեղարքունիք, Վայոց ձոր, Սյունիք և Արագածոտն, գյուղական համայնքներում` առաջնահերթություն տալով աղքատության ամենաբարձր ցուցանիշ ունեցող տարածքներին:

Դավիթ Հարությունյանը շեշտեց, որ ծրագիրը կապահովի խմելու ջրի, ինչպես նաև անասունների և տնամերձ փոքր հողակտորների վրա հիմնական մշակաբույսերի աճեցման համար անհրաժեշտ ջրի կարիքները: