Կառավարությունը նախատեսում է ավելացնել 4 դատավորի հաստիք

Վաղը կառավարության նիստում կքննարկվի «Հայաստանի Հանրապետության դատական օրենսգրքում փոփոխություններ և լրացումներ կատարելու մասին» Հայաստանի Հանրապետության օրենքի նախագիծը:

Նախագծով առաջարկվում է ավելացնել Երևան քաղաքի Արաբկիր և Քանաքեռ-Զեյթուն վարչական շրջանների և Աջափնյակ և Դավթաշեն վարչական շրջանների ընդհանուր իրավասության դատարաններում դատավորների թվաքանակը: Ըստ նախագծի հիմնավորման՝ ավելացման անհրաժեշտությունը պայմանավորված է դատավորների ծանրաբեռնվածությամբ և քննվող գործերի ծավալով:

Դատավորի տարեկան միջին ծանրաբեռնվածությանը թեթևացնելու համար Արաբկիր և Քանաքեռ-Զեյթուն վարչական շրջանների ընդհանուր իրավասության դատարանին անհրաժեշտ է քրեական մասնագիտացում ունեցող դատավորի լրացուցիչ 2 հաստիք: Նույնքան հաստիք էլ անհրաժեշտ է Աջափնյակ և Դավթաշեն վարչական շրջանների ընդհանուր իրավասության դատարաններին, բայց` քաղաքացիական մասնագիտացում ունեցող: Ըստ հիմնավորման՝ դատավորների թվաքանակի ավելացումն, իր հերթին, կնպաստի գործերը ողջամիտ ժամկետում քննելուն: Նշենք, որ նախագիծը մշակվել է ՀՀ վճռաբեկ դատարանի կողմից:

«Հայաստանի Հանրապետության դատական օրենսգրքում փոփոխություններ կատարելու մասին» ՀՀ օրենքի նախագծի ընդունման կապակցությամբ պետական բյուջեում նախատեսվում է կատարել տարեկան 61,684.54 դրամի շարունակական ծախս: