Օսիպյանը Զուրաբյանին «խուժան»-ով չի պատասխանում

Արդեն տեղեկացրել ենք, որ ԱԺ շենքի դարպասների մոտ են հավաքվել սահմանադրական բարեփոխումների դեմ պայքարողները: Նրանց էին միացել նաև ՀԱԿ պատգամավորներ Լևոն Զուրաբյանը և Արամ Մանուկյանը: Ոստիկանության և ցուցարարների միջև տեղի ունեցավ հրմշտոց, որից հետո ելույթով հանդես եկավ Լևոն Զուրաբյանը եւ Երևանի փոխոստիկանապետ Վալերի Օսիպյանին անվանեց «խուժան»:

Yerkir.am-ի հետ զրույցում, անդրադառնալով Զուրաբյանի հնչեցրած գնահատականին, Օսիպյանն ասաց. «Անկախ նրանից, թե որ խմբակցության կամ քաղաքական ուժի ներկայացուցիչ է, եթե վիրավորանք է հասցնում ազգի իրավապահ մարմնի ներկայացուցչին, ապա օրինակ է ծառայում  մեր մյուս քաղաքացիներին, թե` տեսեք, որ կարող ենք այսպես վարվել իրավապահ մարմինների հետ, դուք էլ այդպես շարժվեք, հավաքի հարգելի\' մասնակիցներ»: Նա նաեւ ասաց, որ նույն բանն ասել է Լևոն Զուրաբյանին:

Հարցին, թե այս առնչությամբ պատրաստվո՞ւմ է որևէ քայլի դիմել, Օսիպյանն ասաց, որ դեռ ծառայության մեջ է և հետո կորոշի իր անելիքը: