Ոստիկանությունը խոսք է տվել ազատամարտիկներին

Այսօր ազատամարտիկները հավաքվել էին Աբովյան փողոցում` այնտեղ, ուր երեկ ծեծի էր ենթարկվել ազատամարտիկ Սմբատ Հակոբյանը, որպեսզի խորհրդակցեն, որոշեն հետագա անելիքները:

Լրագրողների հետ զրույցում ազատամարտիկ Ռազմիկ Պետրոսյանը նշեց, որ «Արաբո» ջոկատի հրամանատար Մանվել Եղիազարյանը կապ է հաստատել Երևանի փոխոստիկանապետի հետ, և ոստիկանությունից ասել են, որ ծեծողը` Տիգրանը, արդեն բերման է ենթարկվել ոստիկանություն, ևս 4-5 ժամ է անհրաժեշտ, որ մյուս ծեծողներին էլ գտնեն ու բերման ենթարկեն:

«Մենք էլ մեր միջոցներով ենք նրանց փնտրում: Մեր ընկեր ազատամարտիկները շրջաններից արդեն ճանապարհվել են այստեղ: Այս մի քանի ժամվա մեջ կորոշենք` ինչ անել: Թող իրավապահ մարմինները գործեն, մենք նրանց չենք խանգարի: Եթե զգանք, որ գործն ուզում են կոծկել, մենք որոշում կկայացնենք` մեր ընկերներով»,- ասաց Ռազմիկ Պետրոսյանը: