Համազգային թատրոնը բացում է իր թատերական ստուդիան

Հոկտեմբեր ամսին Համազգային թատրոնը կբացի իր թատերական ստուդիան: Այս մասին լրագրողներին հայտնեց Համազգային թատրոնի տնօրեն Վարդան Մկրտչյանը: Նա տեղեկացրեց, որ ծրագիրը կյանքի է կոչվում «Սոս Սարգսյան» մշակութային հիմնադրամի հետ համատեղ:

«Ստուդիան իր դռներն է բացում տարիքային երկու խմբերի համար` 12-16 և 17-ից բարձրների համար: Ուսման տևողությունը կլինի 13 ամիս, որի ընթացքում կուսուցանվի` բեմական խոսք, վոկալ, դերասանի վարպետություն, պարարվեստ: Կլինեն նաև վարպետության դասեր դրսից հրավիրված դասախոսների կողմից, ինչպես նաև հանդիպումներ արվեստագետների հետ»,- ասաց Մկրտչյանը:

Նա տեղեկացրեց նաև, որ ստուդիայի բացման գլխավոր նպատակը թատրոնի դերասական կազմը թարմացնելն է, դերասանների նոր սերունդ ունենալը: