Սուրիկ Խաչատրյանի որդին դատահոգեբուժական փորձաքննության է ենթարկվել

Մայիսի 2-ին Գորիսի Սդղի գյոլ կոչվող տարածքում տեղի ունեցած միջադեպի գործով մեղադրյալ Տիգրան Խաչատրյանն օգոստոսի 20-ին դատահոգեբուժական փորձաքննության է ենթարկվել: Այս մասին yerkir.am-ին հայտնեց Խաչատրյանի պաշտպան Արմեն Մելքոնյանը: Նրա խոսքով՝ նշանակված փորձաքննության պատասխանները կստացվեն մոտ 15 օրից:

Փաստաբանը նաև հայտնեց, որ իր պաշտպանյալը շարունակում է գտնվել «Նուբարաշեն» ՔԿՀ-ի բուժմասում:

Նշենք, որ նախաքննական մարմինը դատահոգեբուժական փորձաքննություն է նշանակել` ինչպես գործով մեղադրյալների, այնպես էլ տուժողների նկատմամբ:

Հիշեցնենք, որ Տիգրան Խաչատրյանին մեղադրանք է առաջադրվել ՀՀ քրեական օրենսգրքի 112-րդ հոդվածի 1-ին մասի հատկանիշներով (դիտավորությամբ առողջությանը ծանր վնաս պատճառելը), եւ, որպես խափանման միջոց, ընտրվել է կալանավորումը: Ներկայումս նա գտնվում է «Նուբարաշեն» ՔԿՀ-ի բուժմասում, քանի որ, ըստ պաշտպանի, առողջական խնդիրներ ունի: