Լիբիայի ափերի մոտ թուրքական նավ են գնդակոծել. Թուրքիայի ԱԳՆ-ն փոխհատուցում է պահանջում

Թուրքիայի ԱԳՆ-ն հայտարարություն է տարածել՝ հաստատելով մայիսի 10-ին Լիբիայի տարածքից թուրքական բեռնատար նավի ուղղությամբ արձակված կրակոցների մասին լուրը:

Ըստ Hurriyet-ի՝ գնդակոծության  հետևանքով մահացել է նավապետի 3-րդ օգնականը` ազգությամբ թուրք: Կան նաև վիրավորներ:

Թուրքիայի ԱԳ նախարարության տարածած հայտարարության համաձայն՝ թուրքական ընկերությանը պատկանող, սակայն Կուկի կղզիների դրոշը կրող «Թունա-1» նավը, Իսպանիայից ուղևորվել է Լիբիայի Թոբրուկ նավահանգիստ։ Երբ նավը գտնվել է միջազգային ջրերում, նրա ուղղությամբ կրակահերթ է արձակվել ափից:

Նախարարությունը խստորեն դատապարտել է հարձակումը և հայտարարել է, որ սպասում է Լիբիայի իշխանությունների շտապ հետաքննությանը։ Ի դեպ, միջազգային օրենքի համաձայն՝ Թուրքիան իրեն իրավունք է վերապահում փոխհատուցում պահանջելու։