Վերաքննիչը Վարդան Պետրոսյանի դատավճիռը թողեց անփոփոխ

Քիչ առաջ ՀՀ վերաքննիչ քրեական դատարանը վերադարձավ խորհրդակցական սենյակից և հրապարակեց դերասան Վարդան Պետրոսյանի դեմ առաջին ատյանի դատարանի կայացրած վճռի բողոքարկման վերաբերյալ որոշումը:

Դատավորը մերժեց Կոտայքի մարզի դատախազի տեղակալ Վարդան Սարգսյանի և տուժողների իրավահաջորդների ներկայացուցիչ Ռուբեն Բալոյանի բողոքները, և որոշում կայացվեց անփոփոխ թողնել առաջին ատյանի դատարանի որոշումը:

Հիշեցնենք, որ առաջին ատյանի դատարանի վճռով դերասան Վարդան Պետրոսյանը դատապարտվել էր 5 տարվա ազատազրկման, սակայն դատախազն ու տուժող կողմը պնդում էին, որ նա դատապարտվի 6 տարվա ազատազրկման:

Քիչ առաջ լրագրողների հետ զրույցում տուժողի իրավահաջորդ Արթուր Հակոբյանը հայտարարեց, որ բողոքարկելու են վերաքննիչ դատարանի որոշումը: Դիտարկմանը, թե ինչո՞ւ չեն հաշտվում Վարդան Պետրոսյանի հետ, նա պատասխանեց. «Թող երեխաներիս հետ բերի, հաշտվենք»: