Ես Օպերայի գլխավոր դիրիժորն եմ և գոնե դրա համար դիպլոմ ունեմ. Կարեն Դուրգարյան

Երբ ձեր խմբագիրը ստուգում է ձեր նյութը և ինչ-ինչ ուղղումներ անում կամ էլ ասում, որ այն չպետք է հրապարակվի, դա համարո՞ւմ եք մենաշնորհ: Լրագրողների հետ հանդիպման ժամանակ նման կերպ արձագանքեց իր` թատրոնում մենաշնորհային գործունեության վերաբերյալ շրջանառվող լուրերին Ալ. Սպենդիարյանի անվան օպերայի և թատրոնի գլխավոր դիրիժոր Կարեն Դուրգարյանը:

Նա նշեց, որ յուրաքանչյուր ներկայացում ունի իր պատասխանատու դիրիժորը, և ներկայացման` կյանքի կոչվելուց առաջ ունկնդրումն ու շտկումներ անելը մենաշնորհ չէ: «Բացի այդ` ես Օպերայի գլխավոր դիրիժորն եմ և գոնե դրա համար դիպլոմ ունեմ և կարծում եմ` ինչ-ինչ բաներ շտկելու իրավունք ունեմ»,- շեշտեց Դուրգարյանը:

Նրա մեկնաբանմամբ` թատրոնը թիմային աշխատանք է պահանջում, և այսօր այդ թիմը ձևավորման փուլում է: