ՀԽ-ի եւս մեկ անդամ ձերբակալվեց

Հայաստանի քննչական կոմիտեի ՀԿԳ քննության գլխավոր վարչության վարույթում քննվող քրեական գործի շրջանակներում այսօր ձերբակալվել է Գյումրիում Հիմնադիր խորհրդարանի համակարգող Արամ Հակոբյանը, հայտնում են ՀՀ Քննչական կոմիտեից:

Նա կասկածվում է ՀՀ քրեական օրենսգրքի 235-րդ հոդվածի 1-ին մասով նախատեսված արարք, այն է՝ ապօրինի ռազմամթերք ձեռք բերելու եւ պահելու մեջ։ Օրենքով սահմանված կարգով վերջինիս պարզաբանվել են իր իրավունքները, եւ նա ցանկություն է հայտնել ունենալ պաշտպան։ Ա.Հակոբյանի պաշտպանությունն ստանձնել է փաստաբան Տիգրան Եգորյանը։ Նախաքննությունը շարունակվում է։

Ինչպես ավելի վաղ տեղեկացրել էինք, ձերբակալվել են նաեւ ՀԽ-ի նախագահ Ժիրայր Սեֆիլյանը, անդամներ Վարուժան Ավետիսյանը, Գեւորգ Սաֆարյանն, Պավել Մանուկյանը ու Գարեգին Չուգասզյանը՝ ապրիլի 24-ին հրապարակային միջոցառումների անցկացման վայրերում զանգվածային անկարգությունների նախապատրաստության դեպքի առիթով: