Արտակ Խաչատրյանն ու տասնյակ վկաներ ցուցմունք են տվել

Անհայտ անձանց կողմից ծեծի ենթարկված ԲՀԿ-ական Արտակ Խաչատրյանը երեկ ցուցմունք է տվել և մանրամասն նկարագրել կատարվածը: Սակայն ինքնազգացողության վատանալու պատճառով նրա հարցաքննությունը կիսատ է մնացել:

ՀՀ քննչական կոմիտեի ղեկավարի խորհրդական Սոնա Տռուզյանը  yerkir.am-ի հետ զրույցում հայտնեց, որ Խաչատրյանի հարցաքննությունը շարունակվել է այսօր: Նրա խոսքով` այս գործով հարցաքննվել են նաև մի շարք վկաներ: Գործով տուժող ճանաչված Խաչատրյանի ցուցմունքի մանրամասները քննչական կոմիտեն կներկայացնի առաջիկայում:

Հիշեցնենք, որ դեպքի առթիվ հարուցվել է քրեական գործ` ՀՀ քրեական օրենսգրքի 131-րդ հոդվածի 2-րդ մասի 1-ին կետով: Ձեռնարկվում են անհրաժեշտ քննչական եւ օպերատիվ-որոնողական միջոցառումները՝ դեպքի բոլոր հանգամանքները պարզելու, առերեւույթ հանցանք կատարած անձանց ինքնությունը եւ շրջանակը պարզելու ուղղությամբ: Նախաքննությունը շարունակվում է: