ԱԶԲ-ն 5 տարում 500 միլիոն դոլարով կաջակցի Հայաստանին

ԱԶԲ տարածած հաղորդագրության համաձայն՝ ենթակառուցվածքների, էներգետիկայի եւ սոցիալական ծառայությունների ոլորտներին օժանդակելու նպատակով առաջիկա հինգ տարիների ընթացքում բանկը մոտավորապես 500 մլն դոլարի ֆինանսական աջակցություն է ցուցաբերելու:

Հաղորդագրության մեջ մասնավորապես ասված է .«Հաշվի առնելով ռեսուրսների սահմանափակությունը եւ Հայաստանում զարգացման ծրագրեր իրականացնող այլ գործընկերների առկա օժանդակությունը, ԱԶԲ-ն մեծ ներգրավվածություն չի նախատեսի ֆինանսների, առողջապահության եւ կրթության ոլորտներում»:

Ասիական զարգացման բանկը կշարունակի աջակցել Հյուսիս-հարավ ճանապարհային միջանցքի աշխատանքների կատարմանը, ինչպես նաեւ աղքատության բարձր մակարդակ ունեցող քաղաքների միջեւ տրանսպորտային կապերի ամրապնդմանը: 500 միլիոն դոլարից մի մասն էլ հատկացվելու է Հայաստանում վերականգնվող էներգետիկ ռեսուրսների զարգացմանը եւ էներգետիկ ենթակառուցվածքների արդիականացմանը: