Կոնդի, Ֆիրդուսի և Եկմալյան փողոցների բնակիչների բնակարանային խնդիրները կլուծվեն. նախարար

2015-ին կսկսվի մի կիսակառույցի շինարարություն, որը կավարտվի 2016-ին: Շենքը կտրամադրվի Կոնդի բնակիչներին: Այս մասին լրագրողների հետ հանդիպման ժամանակ հայտնեց ՀՀ քաղաքաշինության նախարար Նարեկ Սարգսյանը:

Ըստ նրա` նախարարությունը փորձում է ելքեր գտնել` Կոնդի, Ֆիրդուսի և Եկմալյան փողոցների բնակիչներին տներով ապահովելու համար: «2015-ի վերջին էլ Ֆիրդուսիի` 100-ից ավելի բնակիչների տան խնդիրը կլուծենք` փոխհատուցման միջոցով»,- վստահեցրեց նախարարը:

Նա նշեց նաև, որ Գյումրիում նույնպես այս պահին աղետից տուժածները բնակարանների վկայագրեր են ստանում: Ըստ Սարգսյանի` նախատեսվում է 2015-ի վերջին բոլոր հաշվառված տուժածների բնակարանային խնդիրը լուծել: