Նաիրիտցիները հույս ունեն գոնե այսօր հանդիպել վարչապետի հետ

Այսօր կառավարության շենքի առջև դարձյալ հավաքվել են «Նաիրիտ» գործարանի աշխատակիցները: Նրանք ունեն մեկ պահանջ` ստանալ իրենց մեկուկես տարվա աշխատավարձերը:

Եթե ամիսներ առաջ նաիրիտցիները հույս ունեին, որ գործարանը կվերագործարկվի, որովհետև նման հայտարարություններ էին անում կառավարության ներկայացուցիչները, ապա այժմ նրանք այդ հույսն էլ են կորցրել և պահանջում են իրենց աշխատավարձերը:

Նշենք, որ երեկ նույնպես հարյուրավոր նաիրիտցիներ հավաքվել էին կառավարության շենքի առջեւ` պահանջելով հանդիպում վարչապետի հետ: Վարչապետը նրանց մոտ չիջավ: Նաիրիտցիների հինգ հոգանոց խումբը մտավ կառավարության շենք` վարչապետի հետ հանդիպման, սակայն այդ հանդիպումը այդպես էլ չկայացավ վարչապետի զբաղված լինելու պատճառով:

Այսօր նաիրիտցիները հույս ունեն, որ վարչապետի հետ հանդիպումը կկայանա, և իրենք կկարողանան ներկայացնել իրենց խնդիրները, թեև այդ խնդիրները վաղուց հայտնի են: