Ռեալ ապացույցներ ունենք. Երևանի ոստիկանապետը` Թևոսիկի եղբոր սպանության գործի մասին

«Լիարժեք հայտարարում եմ, որ կան ձերբակալվածներ և լուրջ ապացույցներ, որոնք ռեալ են»,- այսօր` լրագրողների հետ հանդիպման ժամանակ, անդրադառնալով Կայարանցի Թևոսիկի եղբոր` Արթուր Սաֆարյանի սպանության գործին, ասաց Երևանի ոստիկանապետ Աշոտ Կարապետյանը: «Ցանկացած բացահայտում կարելի է դիտել միայն դատարանի վճռով»,- հավելեց նա:

Հիշեցնենք, որ գործի նախաքննությունը տեղափոխվել է, և այն ներկայումս քննվում է ազգային անվտանգության ծառայությունում: 

Պատասխանելով հարցին, թե ինչո՞ւ ոստիկանությունը շտապեց հայտարարել, որ Թևոսիկի եղբոր սպանության դեպքը բացահայտվել է, երբ սպանություն կատարած ենթադրյալ անձի` Մոսոյի դիակը չի հայտնաբերվել, Կարապետյանը նշեց. «Հարուցված է մեկ քրեական գործ, և մեկ քրեական գործի շրջանակներում կատարվում է նախաքննություն: Նախաքննությունով հիմնավորվում է, համենայն դեպս` անմեղության կանխավարկածը հաշվի առնելով, որ եղել է երկրորդ սպանություն: Բայց չէ՞ որ քրեական գործը չի ավարտվել: Մենք ունենք մեկ քրեական գործ»: