Հրազդանում ներկայացվեց «Հայոց ազատամարտը` երգերում» գիրքը

Ռազմահայրենասիրական երգերի վարպետ Սահակ Սահակյանն արդեն մի քանի ամիս է, ինչ ընթերցողի և մասնագիտական շրջանակների սեղանին է դրել իր «Հայոց ազատամարտը երգերում» գիրքը, որն ամփոփում է հայ ռազմահայրենասիրական և հեղափոխական երգարվեստի մեծարժեք գոհարներ: Օրերս գիրքը ներկայացվեց Հրազդանում:

ՀՅԴ Հրազդանի երիտասարդական կենտրոնը կազմակերպել էր հանդիպում, որի ընթացքում Սահակ Սահակյանը գիրքը ներկայացրեց հրավիրյալներին և երիտասարդներին: Հեղինակը նշեց հիշյալ ժանրի երգերի ոչ բավարար տարածումն ու իմացությունը մեզանում, նման երգերի անգնահատելի նշանակությունը և հավելեց, որ իր գիրքը մի փորձ է լրացնելու այդ բացը: Իրենց հերթին կազմակերպիչներն ու հրավիրյալները կատարված, ազգօգուտ աշխատանքի համար, երախտագիտություն հայտնեցին հայոց ազատամարտի փայլուն երգչին: