Ամեն ինչ կանեմ, որ Հայաստան-Լիբանան բազմաոլորտ համագործակցությունն ակտիվանա. Հովիկ Աբրահամյան

Վարչապետ Հովիկ Աբրահամյանն այսօր ընդունել է Լիբանանի էներգետիկայի և ջրի` հայազգի նախարար Արթուր Նազարյանին:

Հովիկ Աբրահամյանը կարևորել է Հայաստանի և Լիբանանի միջև ավանդական բարեկամական կապերը և խոստացել անել ամեն ինչ, որ երկու երկրի հարաբերություններում ակնհայտ դրական տեղաշարժ արձանագրվի, բազմաոլորտ համագործակցությունն ավելի ակտիվանա և ամրապնդվի:

Զրուցակիցները կարևորել են երկկողմ առևտրատնտեսական գործակցության զարգացումը և առկա ողջ ներուժի լիարժեք իրացումը: Այս առումով երկուստեք անհրաժեշտ է համարվել միջկառավարական համատեղ հանձնաժողովի գործունեության ակտիվացումը, ինչը նոր թափ կհաղորդի տնտեսական հարաբերություններին:

Հովիկ Աբրահամյանը և Արթուր Նազարյանը ղրուցել են նաև Մերձավոր Արևելքում տեղի ունեցող իրադարձությունների մասին, անդրադարձել ստեղծված իրավիճակում Լիբանանի հայ համայնքի առաջ ծառացած խնդիրներին և մարտահրավերներին:

Հովիկ Աբրահամյանը Լիբանանի գործընկերոջը հրավիրել է Հայաստան: