Նվազել է Հայաստանից Թուրքիա մեկնողների թիվը

Նախկինում Ստամբուլ-Երևան չվերթերն իրականացվում էին շաբաթական երկու անգամ՝ կիրակի և չորեքշաբթի օրերին, այժմ դրանք կիրականացվեն շաբաթական մեկ անգամ՝ կիրակի օրերին. հայտնում է «Ակօս»-ը:

Չվերթերի կրճատումը պատճառաբանելով Հայաստանի տնտեսական վիճակի վատթարացմամբ՝ թուրքական Tower ավիաընկերության սեփականատեր Տիգրան Ալթունն ասել է. «Մեր ուղևորների 90 տոկոսը գալիս է Հայաստանից, հատկապես՝ ճամպրուկի առևտրով զբաղվողները, որոնք էլ Հայաստանի տնտեսական վիճակի պատճառով սկսել են քիչ գալ»:

«Հունիսի 12-ից սկսում ենք Երևան-Անթալիա չվերթերը, սակայն կարծում եմ, որ, ի տարբերություն նախորդ տարիների, այս տարի եկողների թիվը քիչ է լինելու: Իսկ տոմսերի արժեքները մնալու են նույնը»,- ասել է Ալթունը: