Շարմազանովն ընդունելի կետեր է տեսնում ՀՅԴ ծրագրում

Ազգային ժողովի փոխնախագահ Էդուարդ Շարմազանովը News.am-ի հետ զրույցում հայտարարել է, որ ՀՅԴ ներկայացրած ծրագրում «մեզ համար ընդունելի կետեր կան»:

Նա վերահաստատել է, որ ՀՀԿ-ն ՀՅԴ-ն ու ԲՀԿ-ին նոր կառավարության հետ համագործակցելու առաջարկ է արել, ինչը նրանք կարող են ընդունել` ինչպես մասնակի, այնպես էլ ամբողջական պատասխանատվություն ստանձնելով:

«Մենք դրական ենք վերաբերվում, որ ՀՅԴ-ն ունի հստակ կառուցողական մոտեցում: Մինչև 20-օրյա ժամկետի ավարտը թե' մենք, թե' մեր գործընկերները ժամանակ ունեն, ամեն ինչ կքննարկենք և կհայտնենք դիրքորոշում: Մենք չենք գնում կուսակցամոլության ճանապարհով, մենք համագործակցության կողմնակից ենք և մեր գործընկերների առջև ոչ միայն դռներ չենք փակում, այլև պատրաստ ենք համադրելու մեր ծրագրերը, նաև ապագայում միասին իրականացնելու նոր ծրագրեր և բարեփոխումներ»,- ասել է Շարմազանովը: