ՄՄ-ին անդամակցելու հետեւանքով հրաժարվում ենք եվրոպական ստանդարտներով գյուղմթերք արտադրելուց

Կառավարությունը վաղը ուժը կորցրած կճանաչի կառավարության` 2012 թվականի հուլիսի 18-ի «Գյուղատնտեսության և ագրովերամշակման ոլորտների օրենսդրական դաշտը Եվրամիության օրենսդրական դաշտին մոտարկման ծրագիրը հաստատելու մասին» N 1328-Ն որոշումը: Նման որոշման անհրաժեշտությունը պայմանավորված է Հայաստանի Հանրապետության` ՄՄ-ին և Միասնական տնտեսական տարածքին անդամակցությամբ:

Գյուղատնտեսության եւ ագրովերամշակման ոլորտների օրենսդրական դաշտը ԵՄ դաշտին մոտարկելու ծրագիրը հիմնականում հայկական արտադրության գյուղատնտեսական ապրանքները ԵՄ պահանջներին համապատասխանեցնելուն էր ուղղված, որի անհրաժեշտությունը ՄՄ-ին անդամակցելուց հետո, բնականաբար, վերանում է:

Այսինքն` Հայաստանը որդեգրել է Մաքսային միությանն անդամակցության պետական քաղաքականություն, որի արդյունքում անհրաժեշտություն է առաջանում ագրոարդյունաբերության ոլորտի` Հայաստանի Հանրապետության օրենսդրական դաշտը համապատասխանեցնել ոչ թե ԵՄ, այլ ՄՄ համապատասխան օրենսդրությանը:

«Գյուղատնտեսության և ագրովերամշակման ոլորտների օրենսդրական դաշտը Եվրամիության օրենսդրական դաշտին մոտարկման ծրագիրը հաստատելու մասին» որոշումն ուժը կորցրած ճանաչելուց հետո կսկսվի ագրոարդյունաբերության ոլորտի` Հայաստանի Հանրապետության օրենսդրական դաշտը Մաքսային միության համապատասխան օրենսդրական դաշտին համապատասխանեցնելու գործընթացը: