Սնոուդենի հետ երբեք չեմ հանդիպել, գործերս շատ են. Պուտին

«Սնոուդենի հետ երբեք չեմ հանդիպել, գործերս շատ են, նա էլ իր գործերն ունի»,- ասել է ՌԴ նախագահ Վլադիմիր Պուտինը մամուլի ասուլիսի ժամանակ՝ պատասխանելով լրագրողի համապատասխան հարցին:

«Ես անձամբ ծանոթ չեմ ԱՄՆ ԿՀՎ նախկին աշխատակից Էդուարդ Սնոուդենի հետ և երբևէ չեմ հանդիպել նրա հետ, ես իմ գործերն ունեմ, նա՝ իր: Թեեւ ասեմ, որ նա ինձ համար հետաքրքիր անձնավորություն է, և հենց նրա շնորհիվ է, որ շատ մարդիկ այլ աչքերով նայեցին ժամանակակից խոշոր գործիչների գործունեությանը»,- ասել է նա:

Պուտինը նաև ընդգծել է, որ այն, որ Սնոուդենը բնակվում է Ռուսաստանում, չի նշանակում, որ նա հակաամերիկյան քարոզչությամբ է զբաղվում: