UNASUR-ը բացատրություն եւ ներողություն է պահանջում եվրոպական մի քանի երկրներից

UNASUR բլոկի մեջ մտնող լատինաամերիկյան 12 երկրների առաջնորդները բացատրություն եւ ներողություն են պահանջել Եվրոպայի մի քանի պետություններից Բոլիվիայի նախագահ Էվո Մորալեսի ինքնաթիռի հետ կապված միջադեպի կապակցությամբ: Բոլիվիայում անցկացված արտակարգ գագաթաժողովում հայտարարություն է ընդունվել, որում պահանջվում է, որ Ֆրանսիայի, Պորտուգալիայի, Իտալիայի եւ Իսպանիայի կառավարությունները կոնկրետ պատասխաններ տան, թե ինչու են փակել Մորալեսի ինքնաթիռի համար իրենց օդային տարածքները եւ ներողություն խնդրեն նրանից. տեղեկացնում է Интерфакс-ը: 

Հիշեցնենք, որ երբ Մորալեսի ինքնաթիռը վերադարձել է Մոսկվայից, այն պարտադրաբար վայրէջք է կատարել Վիեննայի օդանավակայանում, քանի որ կասկածներ են եղել, թե ինքնաթիռում ԿՀՎ նախկին գործակալ Էդվարդ Սնոուդենն է:

Գագաթաժողովին մասնակցել են Արգենտինայի, Ուրուգվայի, Էկվադորի, Սուրինամի, Վենեսուելայի եւ Բոլիվիայի բարձրաստիճան առաջնորդներ, բլոկի եւս 6 անդամ ավելի ցածր մակարդակի ներկայացուցիչներ են ուղարկել: