Հայաստանը կմասնակցի միջազգային զբոսաշրջային էքսպոյի

Հունիսի 13-16-ը Հայաստանի ազգային մրցունակության հիմնադրամը կմասնակցի Հոնկոնգում կայանալիք ITE & MICE միջազգային զբոսաշրջային էքսպոյին. հայտնում են Հայաստանի ազգային մրցունակության հիմնադրամի հանրային կապերի գրասենյակից:

Այս էքսպոն Ասիայում զբոսաշրջության ոլորտի ամենամեծ միջոցառումներից է, որին մասնակցում են 50 երկրների շուրջ 600 զբոսաշրջային կազմակերպություններ և կառավարության ներկայացուցիչներ: 

Խոշորագույն այս ցուցահանդեսին ՀԱՄՀ մասնակցությունը նպատակ ունի շարունակելու ասիական շուկայում Հայաստանի ներկայացվածության խթանմանն ուղղված ջանքերը, հայկական զբոսաշրջային արդյունքների իրացման համար գործընկերային նոր կապեր հաստատել և նպաստել ներգնա զբոսաշրջության աճին:

ՀԱՄՀ պատվիրակությունը հանդիպումներ կունենա Հոնկոնգի զբոսաշրջության ոլորտի ներկայացուցիչների հետ, կքննարկվեն երկկողմանի զբոսաշրջային շփումները որակապես նոր մակարդակի բարձրացնելու հնարավորությունները: