Հունաստանն ամեն ինչ անում է Սիրիայում առեւանգված եպիսկոպոսներին ազատելու համար

Հունաստանը միջոցներ է ձեռնարկում Սիրիայում այսօր առեւանգված երկու եպիսկոպոսներին ազատելու ուղղությամբ: Նրանցից մեկը Սիրիական մարոնիտ թեմի եպիսկոպոս Յոհան Իբրահիմն է, մյուսը`  Հույն ուղղափառ եկեղեցու Հալեպի եպիսկոպոս Պողոս Յազիգին. տեղեկացնում է РИА Новости-ն:

Հունաստանի վարչապետ Անտոնիս Սամարասը հանձնարարել է արտգործնախարար Դիմիտրիս Ավրամոպուլոսին, ով գտնվում է Բրյուսելում` ՆԱՏՕ-ի արտգործնախարարների հանդիպմանը, ամեն ինչ անել եպիսկոպոսներին ազատելու համար: Վարչապետը եւ արտգործնախարարն արդեն հեռախոսազրույց են ունեցել Անտիոքի պատրիարքի հետ եւ Հունաստանի կառավարության զորակցությունը հայտնել նրան: Արտգործնախարարը նաեւ զրուցել է սիրիական ընդդիմության նոր ղեկավար Ջորջ Սաբրի հետ, որը վստահեցրել է, թե անմիջապես գործի կդնի բոլոր ուժերը` եպիսկոպոսների գտնելու համար: