ԼՂՀ հակամարտությունը պետք է բացառապես քաղաքական լուծում ունենա

Իրանը կարեւորում է Լեռնային Ղարաբաղի հակամարտության քաղաքական լուծման եւ երկխոսության անհրաժեշտությունը. լրագրողներին այսօր ասաց Իրանի արտաքին գործերի նախարարության մամուլի խոսնակ Ռամին Մեհմանփարաստը:

Բանախոսը նշեց, որ Իրանը միշտ էլ պատրաստակամություն է հայտնել իր հնարավորությունների ամբողջ կարողությամբ օգնել Հայաստանին ու Ադրբեջանին` այս հարցի կարգավորման համար, եթե վերջիններս դիմեն իր միջնորդությանը: Բայց, նշեց դիվանագետը, կարգավորման բանակցություններն ընթանում են այլ ձեւաչափով, այլ միջնորդների մասնակցությամբ, ուստի Իրանը հաջողություն է մաղթում ԼՂ հակամարտության կարգավորման ներկա ձեւաչափին:

Իրանի արտաքին գործերի նախարարության մամուլի խոսնակը շեշտեց տարածաշրջանային անվտանգության կարեւորությունը եւ նշեց, որ խաղաղությունը, անվտանգության ու կայունության ապահովումը բխում են տարածաշրջանի բոլոր երկրների շահերից: