Սիրիահայերի համար թաղամասեր` Մասիսում, Աշտարակում և Վաղարշապատում

Մարտի 11-ին ՀՀ Սփյուռքի նախարար Հրանուշ Հակոբյանը հանդիպել է Հայաստանի բուհերում սովորող սիրիահայ ուսանողների խորհրդի անդամների հետ:

Ծանոթանալով ուսանողների խնդիրներին, նախարարը խորհրդի անդամներին առաջարկել է բացահայտել սիրիահայ ուսանողների խնդիրները և ներկայացնել ՀՀ սփյուռքի նախարարություն, որպեսզի հնարավոր լինի առավել արդյունավետ կերպով զբաղվել դրանց լուծմամբ:

ՀՀ Սփյուռքի նախարարը հայտնել է նաև, որ Մասիսի, Աշտարակի և Վաղարշապատի քաղաքապետերի հետ նախնական պայմանավորվածություն է ձեռք բերվել այդ քաղաքներում սիրիահայերի համար թաղամասերի կառուցման վերաբերյալ: Այս պահին քննարկվում է ֆինանսական միջոցներ գտնելու խնդիրը: Հայտնի են առաջին հովանավորները: Նոր բնակարանների կառուցման հարցում ծախսերի մի մասը հոգալու են հենց սիրիահայ շահառուները: