Ֆրանսիացիները չեն սիրում աշխատել. ամերիկացի գործարար

Անվադողեր արտադրող ամերիկյան Titan ընկերության ղեկավար Մորիս Թեյլորը փակել է ֆրանսիական Ամիեն  քաղաքում գործող իր Goodyear գործարանը, ինչի հետեւանքով 1173 մարդ գործազուրկ կդառնա: Այդ մասին գործարարը նամակով տեղյակ է պահել Ֆրանսիայի արդյունաբերության նախարարին եւ քննադատել ֆրանսիացի բանվորների աշխատանքը:

«Ես բացմիցս այցելել եմ գործարան: Ֆրանսիացի բանվորները բարձր աշխատավարձ են ստանում, սակայն օրվա ընթացքում ընդամենը 3 ժամ են աշխատում: Նրանք մեկ ժամ ճաշում են, հետո մի քանի ժամ լեզուների տալիս: Ստացվում է, որ ընդամենը 3 ժամ են աշխատում: Ես նրանց այդ մասին ուղիղ եմ ասել, ինչին ի պատասխան լսել եմ, որ Ֆրանսիայում այդպես է ընդունված»,- գրել է Թեյլորը:

Ֆրանսիայում գործարարի նամակը բուռն արձագանք է ստացել: Արհմիությունները նման գնահատականը որակել են որպես վիրավորական: