Խոշոր ավտովթար` Գեղարքունիքի մարզում

Փետրվարի 17-ին խոշոր ավտովթար է տեղի ունեցել Գեղարքունիքի մարզում: Ժամը 22:00-ի սահմաններում Սևան-Գավառ ավտոճանապարհի Լճափ գյուղի խաչմերուկում բախվել են փայտով բարձած բեռնատարն ու «ՎԱԶ 2106» մակնիշի ավտոմեքենաները:

Ֆոտոլրագրող Գագիկ Շամշյանի հաղորդմամբ` վթարի հետևանքով «ԶԻԼ»-ը կողաշրջվել է, իսկ ողջ բարձած փայտը թափվել է «ՎԱԶ 2106»-ի վրա, «ՎԱԶ 2106»-ը նույնպես կողաշրջվել է: Վթարի հետևանքով 2 հոգի մահացել է, 1 հոգի ծայրահեղ ծանր վիճակով տեղափոխվել է Գավառի բժշկական կենտրոն:

Ֆոտոլրագրողը հայտնում է, որ մահացածները «ՎԱԶ 2106»-ի ուղևորներ մայրն ու որդին են, իսկ վիրավորը հայրն է։

Այս պահին Գավառի հրշեջ-փրկարարաները հեռացնում են փայտերը ավտոմեքենայի վրայից, որպեսզի պարզեն, թե մեքենայում կա՞ն քաղաքացիներ, թե՞ ոչ:

Գավառի ոստիկանության օպերատիվ-քննչական խումբը մի քանի քննիչներով փորձում են պարզել մահացածների և վիրավորի ինքնությունը: