Ֆրանսիայի, ՌԴ եւ ԱՄՆ դիրքորոշումը Ստեփանակերտի օդանավակայանի հարցում նույնն է

ՌԴ ԱԳ նախարարության պաշտոնական ներկայացուցիչ Ալեքսանդր Լուկաշևիչից այսօր ռուս լրագրողները փորձել են պարզել երկրի դիրքորոշումը Ստեփանակերտի օդանավակայանի բացման հարցում, սակայն նախարարի պատասխանն այնքան էլ հստակ չի եղել:

Նա նշել է, որ ԵԱՀԿ Մինսկի խմբի համանախագահող երկրները բազմիցս են արտահայտել իրենց դիրքորոշումն այս հարցում: ՌԴ ԱԳՆ կայքի փոխանցմամբ` նախարարը մեջբերել է նրանց տարածած համատեղ հայտարարությունից մի հատված, որտեղ նշվում է, որ կողմերը հերթական անգամ վստահեցրել են համանախագահներին, որ ձեռնպահ են մնալու ուժի և ուժի կիրառման սպառնալիքից` քաղաքացիական ինքնաթիռների հարցում և մտադիր են այդ խնդիրը լուծել դիվանագիտական ճանապարհով:

Լուկաշևիչի խոսքով` այս հայտարարությունն արտահայտում է ՄԽ բոլոր երեք համանախագահ երկրների` Ռուսաստանի, Ֆրանսիայի եւ ԱՄՆ-ի դիրքորոշումը: