Թուրքիան ԱՄՆ-ից 140 մլն դոլարի հրթիռ է գնելու

Թուրքիան դիմել է ԱՄՆ-ին իրեն «երկինք-երկինք» դասի 117 Sidewinder հրթիռներ վաճառելու խնդրանքով, որոնք համալրելու են երկրի ռազմաօդային ուժերի զինանոցը: Այդ մասին, ըստ vesti.az-ի, հայտնել է ԱՄՆ ՊՆ անվտանգության բնագավառում համագործակցության գործակալությունը:

Գործակալությունն արդեն տեղեկացրել է ԱՄՆ Կոնգրեսին Թուրքիային` 140 մլն դոլարի հրթիռներ վաճառելու հնարավորության մասին: Եթե Կոնգրեսը 15 օրվա ընթացքում չմերժի գործակալության հայտը, գործարքը կկայանա:

Գործակալությունը Կոնգրեսին վստահեցրել է, որ գործարքը չի խախտի տարածաշրջանում ռազմական հավասարակշռությունը, նաեւ նշել է, որ Թուրքիայի պաշտպանական կարողությունների ամրապնդումը չի հակասում Վաշինգտոնի շահերին: