Լիբանանի ԱԺ նախագահը Հայաստանին բաց սահման է մաղթում

Լիբանանի ԱԺ նախագահ  Նաբիհ Բըրրին, ելույթ ունենալով Հայաստանի Ազգային ժողովում, մաղթեց, որ Թուրքիայի խորհրդարանը շտապի վավերացնել երկու երկրների միջեւ ստորագրված համաձայնագրերը:

«Արաբական մեր ժողովուրդների ամբողջական շահերից է բխում փակված տեսնել բոլոր տեսակի անհամաձայնության էջերը, նաեւ ընդառաջ գնալ` տեւականորեն բաց պահելու Հայաստանի եւ Թուրքիայի ցամաքային սահմանները, շուտափույթ համաձայնության հասնել Ղարաբաղի հարցում` հաշվի առնելով այդ տարածքի բնակիչների տեսակետը, եւ բարիդրացիական ամբողջական հարաբերություններ հաստատել միմյանց հետ»,- ասաց նա:

Նաբիհ Բըրրին հիշեցրեց, որ իրենք իրենց ուրախությունն են հայտնել 2008-ին սկսված հայ-թուրքական բանակցությունների կապակցությամբ. «Թուրքիայի` «հարեւանների հետ զրո խնդիր» քաղաքականությունը զիջումներ է պահանջում յուրաքանչյուր կողմից` ի շահ ժողովուրդների տնտեսական զարգացման  եւ սոցիալական վերելքի»: